Куды пайсці ў вялікія выхадныя 21–25 красавіка ў Мінску, Варшаве, Вільнюсе і Вене

Праект Cinemascope працягвае паказваць кіно ў музеі Азгура. Гэтым разам клічуць на «Туз у рукаве» (Ace in the Hole) 1951 года (на мове арыгінала з рускімі субтытрамі).

Журналіст Чарльз Тэйтум, які працаваў раней на буйную нью-ёркскую газету, змушаны з-за свайго п’янства змяніць месца працы і перабрацца ў глухую правінцыю. Ён спадзяецца даць новы старт сваёй кар’еры, аднак на працягу цэлага года не можа знайсці дастойную тэму. Аднойчы ён даведваецца, што непадалёк нейкі Леа Мінаса затрымаўся ў старой індзейскай шахце і не можа адтуль выбрацца. Чарльз вырашае, што гэта менавіта тое, што ён так доўга шукаў, і пачынае рабіць з гэтай гісторыі вялікую сенсацыю…

На выставе Big City Life можна ўбачыць графіку і скетчы актуальных беларускіх аўтараў: Ганны Кохан, Веранікі Талецкай, Лізаветы Емяльянавай, Міхаіла Дайлідава, Марыі Сыракваш і Наталлі Язерскай. Кожны з іх прадстаўляе сваё ўспрыманне Вялікага горада ва ўзаемадзеянні з чалавекам, які адчувае сябе неад’емнай часткай места, але адначасова з тым пакутуе ад урбаністычнай адзіноты і сацыяльнай трывогі.

Упершыню батанічны сад запрашае наведаць калекцыі закрытага аранжарэйнага фонду «Кветкі красавіка – пеларгонія і гербера». Можна будзе пабачыць каля 150 відаў і сартоў пеларгоніі, герберы і іншых прыгожаквітнеючых раслін, у тым ліку і ўнікальныя гатункі герберы ўласнай селекцыі.

Хітрасплецены «Кітайскі квартал» пачынаецца як гісторыя пра нявернага мужа, затым ператвараецца ў гангстарскі фільм, а заканчваецца як экзістэнцыяльная драма.

Рыхтуючыся да здымкаў, сцэнарыст Роберт Таун і Раман Паланскі азагаловілі кожную сцэну асобнымі прапановамі, напісалі гэтыя прапановы на кавалачках паперы і расклеілі іх на дзвярах кабінета ў доме Паланскі, дзе яны працавалі. Гульня складалася ў тым, каб перасоўваць гэтыя лісточкі датуль, пакуль яны не складуцца ў патрэбным парадку.

Усе мінскія моднікі зноў збяруцца ў адным месцы – на выхадных будзе праходзіць барахолка «Open Шкаф». Як і раней, вас будуць чакаць два паверхі знаходак і прыгажосці, design market, vintage market, garage sale, vinyl market, а таксама бар з ежай і напоямі.

Калі любіце рэчы беларускіх дызайнераў, завітайце на «Вялікі модны маркет». Ён будзе праходзіць у суботу і нядзелю ў ГЦ Palazzo. Там знойдзеце і шмат адзення, і нямала аксесуараў – і ўсё made in Belarus.

Акрамя таго, будуць і розныя смакоцікі: напрыклад, букеты з зефірных кветак!

Прастора «Манахром» прадстаўляе другі праект неакласічнай музыкі піяніста і кампазітара Філіпа Шпартава. На гэты раз рамантычная ігра на фартэпіяна дапоўніцца цёплым пачуццёвым голасам віяланчэлі, што надасць асаблівыя фарбы той вобразнай музыцы, якая прагучыць.

Партыю віяланчэлі выканае Паліна Чаркас. У праграме: аўтарскія творы, кампазіцыі Ханца Цымера і Людавіка Эйнаудзі.

У Нацыянальнай бібліятэцы адкрылася выстава «Мікола Гусоўскі. Песня пра зубра», прымеркаваная да 500-годдзя з часу першага выдання паэмы.

У экспазіцыі можна пабачыць выданні з фонду Нацыянальнай бібліятэкі, аб’яднаныя агульнай тэмай сюжэта паэмы, а таксама творы беларускіх мастакоў і навучэнцаў Акадэміі мастацтваў і гімназіі-каледжа мастацтваў імя Ахрэмчыка.

Апошнія дні ў галерэі «ДК» працуе выстава жывапісу і графікі беларускага мастака Захара Кудзіна (1986–2019) UNTITLED.

Усе карціны – без назвы, гэта дае магчымасць пагрузіцца ў палатно цалкам, стаць часткай чагосьці невядомага і новага. Гэта праца з падсвядомасцю, калі бачыш не тое, што хочаш убачыць, не шукаеш сэнсу, а знаходзішся тут і цяпер у бясконцым дыялогу з карцінай. Так проста ўчапіцца за нешта звыклае нашаму воку, а вось запусціць працэс мазгавой актыўнасці дазваляе абстракцыя з дапамогай формы, колеру, святла, ліній і аб’ёму. Гэта проста, але нялёгка, і быць там, дзе не быў, рабіць тое, што раней не рабіў.

Захар з’яўляецца самым маладым мастаком, праца якога знаходзіцца ў калекцыі Нацыянальнага мастацкага музея Беларусі. Таксама яго працы знаходзяцца ў прыватных калекцыях Германіі, ЗША, ААЭ, Польшчы, Бельгіі і Францыі.

Калі вы рамеснік ці думаеце ім стаць, схадзіце на канферэнцыю Craft Day. У праграме: тэорыя і практыка па пачатку дзейнасці, кейсы поспехаў і правалаў ад дзеючых рамеснікаў, ідэі партнёрства і шмат нетворкінгу.

Падрабязнасці і рэгістрацыя на канферэнцыю тут – будзе карысна!

У суботу арт-менеджарка і куратарка з Беларусі Вольга Мжэльская правядзе экскурсію на рускай мове па выставе «Ганна Пташкоўска. Выпадкова».

«Часцей за ўсё ў музеях сучаснага мастацтва чакаеш убачыць выставы менавіта мастакоў і мастачак: свежыя працы або рэтраспектывы – але ў дадзеным выпадку мы бачым выставу, якая расказвае гісторыю пра легендарную жанчыну – акумулятар сучаснага мастацтва ў Польшчы і Францыі – Анку Пташкоўскую».

У Доме культур на варшаўскай Празе пройдзе беларускі дзень. Будуць жывая музыка, майстар-класы, танцы і спевы. А з 13:00 да 16:00 пройдзе майстар-клас па выкананні традыцыйнага беларускага строю.

Уваход на мерапрыемства вольны, але на майстар-класы патрэбна рэгістрацыя.

У нядзелю праект «Дыяфільм live» ладзіць вясновы паказ сваіх «Казак на плёнках». Як заўсёды, будуць дыяфільмы з жывой музыкай і акцёрскай агучкай; вельмі раім пабываць, нават калі вы дарослы і без дзяцей, – гэта цуд.

Пасля паказу будзе майстар-клас па ценявым тэатры, дзе дзеці (ад 3 гадоў) разам з дарослымі створаць сваіх уласных казачных персанажаў і прыдумаюць новую гісторыю ў промні праектара.

У нядзелю беларускія комікі з суполкі «Пан Стэндап» ладзяць «Пазакласнае чытанне» і прапануюць разабраць, як павінна быць у школе, але ніколі не было.

У 16:00 Дзіма Нарышкін, Дзіма Саўян, Саша Калінкін і Ягор Анісімаў разбяруць «Запіскі Самсона Самасуя» Андрэя Мрыя.

У 19:00 да дошкі пойдуць Макс Канавал, Паша Залуцкі, Міхась Ільін ды Андрусь Райн. Адказваць будуць «Мову» Віктара Марціновіча.

На выхадных мастачка Руфіна Базлова, славутая сваімі вышыванкамі на злабадзённыя тэмы, запрашае беларусаў Вільнюса на майстар-клас па вышыўцы Framed in Belarus. Мэта акцыі – расказаць пра кожнага несправядліва асуджанага грамадзяніна Беларусі і стварыць яго гісторыі ў традыцыйнай беларускай тэхніцы вышыўкі чырвонай ніткай на белым фоне.

Удзельнікаў навучаць першым крокам у працы са схемай і вышыўкай. Майстэрня разлічана на дарослых і моладзь ад 16 гадоў і будзе на англійскай мове. Пры неабходнасці будуць каментарыі на літоўскай, беларускай ці рускай.

Create Culture Space запрашае на лекцыю-чытку пра творчасць аднаго з самых прыкметных яўрэйскіх літаратараў міжваеннага часу Мойшэ Кульбака (1896–1937).

Падчас імпрэзы паэт-перакладчык Андрэй Хадановіч будзе расказваць пра геніяльнага яўрэйскага літаратара, чыя творчасць шчыльна звязаная з Менскам і Вільняй. Будуць чытаць беларускія пераклады лірыкі паэта, а таксама яго паэмы «Райсн/Беларусь».

У суботу Света Бень грае лямпавы сольны кватэрнічак у Вене – пад укулеле, гармонік і кішэннае піяніна. Будуць размовы пра ўсё на свеце, вершы, гучнае і ціхае, смешнае і нямое, прыгожае і якое адштурхоўвае, вельмі важнае і абсалютна бескарыснае – усё сустрэнецца, перамяшаецца і ператворыцца ў нешта непазбежна далікатнае і немагчымае для апісання.

Замовіць месцы можна па нумары +43 690 100 908 52 (Юлія).