Куды пайсці ў выхадныя 5–7 студзеня ў Мінску, Варшаве і Берліне

У пятніцу ў батанічным садзе запланаваны бясплатны майстар-клас «Навагодняя кампазіцыя» пры наведванні Саду ліхтароў «Макра Мікра Свет». На майстар-класе вы зможаце стварыць навагоднюю кампазіцыю з жывых галінак піхты, сабраных у кашпо, а таксама са штучнага і прыроднага дэкору – ёлачных цацак, шышак, снежнага спрэю і іншага. Тое, што ў вас атрымаецца, вы зможаце забраць з сабой.

Светлая меланхолія і рознакаляровыя агеньчыкі надзеі – праект Cinemascope запрашае разам паглядзець фільм «Каляды, зноў» у дворыку Музея-майстэрні З. І. Азгура. Прагляд будзе арганізаваны на свежым паветры (таму апранайцеся цёпла і бярыце з сабой пледы) і са святочнымі пачастункамі.

Стужку будуць паказваць на мове арыгінала (англійская) з рускімі субцітрамі. Білеты можна набыць у касе музея альбо тут.

Ва ўтульнай атмасферы прыглушанага святла і свечак вы зможаце расслабіцца і адпачыць пад музыку, напоўненую чысцінёй і прасвятленнем, пад відэашэраг з відамі прыроды, святочных гарадоў, урачыстых упрыгажэнняў, карцін вялікіх мастакоў, глыбокага космасу.

Галоўная асаблівасць канцэрта – гучанне вялікага канцэртнага аргана, аднаго з самых вялікіх у краінах СНД, які складаецца з больш чым 6000 труб. Яго гукі гарманізуюць псіхаэмацыйную сферу, прыводзяць у парадак розум. Таксама вы пачуеце вельмі рэдкае гучанне аркестравага гонга: гэтай незвычайнай музычнай прыладзе прыпісваюць лячэбны эфект для цела на клеткавым узроўні.

У суботу «Беларуская хатка» на Рабкораўскай запрашае на імпрэзу «Прыйшла Каляда!». Фальклорны ансамбль «Млынок» рыхтуе для вас віншаванні калядоўшчыкаў, абрад «Ваджэнне казы» і калядныя гульні. Білеты можна набыць у касе музея перад імпрэзай.

На майстар-класе ўдзельнікі створаць з пражы і кардонных нарыхтовак арыгінальную зорку, якую можна дапоўніць фатаграфіяй, карцінкай або маленькай паштоўкай і ўпрыгожыць свой дом або выкарыстоўваць у якасці падарунка. А дапаможа ў стварэнні зорачкі вопытны мастак Руслан Сяргееў.

Цяпер у кінатэатры «Цэнтральны» праходзіць кінамарафон «Иноекино. HIGHLIGHTS 2023». У рамках яго пакажуць фільм, які атрымаў прэмію «Оскар» у 2015 годзе, – «Апантанасць». Гэта дынамічная гісторыя пра пагоню за дасканаласцю і цану велічы, якую рэжысёр Дэм’ен Шазэл расказвае нам праз прызму ўзаемаадносін джазавага барабаншчыка і яго настаўніка. Пад шалёны барабанны рытм разгортваецца сапраўдная бітва двух асоб, выпрабаванне межаў іх вынослівасці, самаахвяравання і маралі.

29 снежня ў галерэі FARBA пачаў працаваць новы выставачны праект «НейроБеларусь» – адна з самых інавацыйных мастацкіх выстаў. Публіцы будзе прадэманстравана рэвалюцыйная калекцыя больш чым з 90 прац, створаных штучным інтэлектам, якія паказваюць беларускую прыроду, архітэктуру, кухню, міфалогію, гісторыю і шмат іншага.

Выстава будзе працаваць да 3 сакавіка кожны дзень з 12:00 да 21:00.

У батанічным садзе ў гэтыя выхадныя пройдзе вялікі сямейны кірмаш «Зімовы сад». Будзе анімацыйная праграма з любімымі і новымі героямі – эльфы, Грынч, «Фіксікі», Гары Потэр, Мікі і Міні Маус і іншыя, фуд-зона, майстэрня Дзеда Мароза з майстар-класамі і займальныя конкурсы. А яшчэ вас чакае кірмаш забаў і незабыўнае шоу.

Творчая прастора ў цэнтры Мінска Accidental Point толькі-толькі адышла ад Новага года і ўжо запрашае на новыя вечарыны. У суботу тут будуць танцы пад Lavrov і Forgotika (пачатак – 22:00), а ў нядзелю з 19:00 прыходзьце паслухаць каляднае танга ад творчага аб’яднання Avant-gardo.

3 студзеня спаўняецца 80 гадоў з дня нараджэння Міхася Раманюка, выдатнага беларускага мастацтвазнаўца, этнографа, мастака і фотамастака. Менавіта ён сфарміраваў навукова абгрунтаваную і па-мастацку асэнсаваную канцэпцыю гісторыі беларускага народнага касцюма. Сённяшняя падборка знаёміць з малюнкамі-рэканструкцыямі беларускіх народных строяў, выкананымі Міхасём.

Да 10 студзеня вы яшчэ можаце паспець паглядзець графіку і фотаздымкі мастака на выставе «Анталогія прыгажосці. Традыцыйны беларускі касцюм».

У прасторы «Робім разам» адкрылася выстава турэмных малюнкаў палітзняволенага (яго сілавікі ўключылі ў спіс людзей, «якія маюць дачыненне да экстрэмісцкай дзейнасці») «Беларусь у сэрцы». На выставе ўпершыню сабраныя разам усе 24 малюнкі, дасланыя з-за кратаў, якія мужчына намаляваў на папяровых аркушыках звычайнымі алоўкамі.

Пачніце год з вясёлага мерапрыемства ў коле аднадумцаў. А 16-й пачнецца праграма для дзетак са святым Мікалаем і іншымі казачнымі героямі, а ў 18:00 для дарослых зайграе навагодні канцэрт Алесь Лютыч, лідар гурта B:N:. Будзе ўтульны салодкі стол, таму прыносьце штосьці смачнае пад гарбатку і каву.

У пятніцу ва Вроцлаў вяртаецца з калядным канцэртам па-ранейшаму непараўнальны бард Зміцер Вайцюшкевіч. Гучыць як добры план на вечар перад выхаднымі.

У нядзелю беларусаў Берліна запрашаюць разам адзначыць Каляды па-сямейнаму ў кампаніі Святланы Бень. Спадарыня Святлана прапануе павандраваць у часе і трапіць у чароўную калядную гісторыю «Дзверцы ў сэрца». Будзеце майстраваць ляльку-казу і саламянага павука, размалёўваць святочныя пернікі і, канешне ж, калядаваць, спяваць і вадзіць карагоды. На месцы можна будзе набыць глінтвейн, дзіцячы пунш і розныя прысмакі.