«Журфак па суботах» запрашае беларусак і беларусаў, якія хочуць пачаць або развіваць кар’еру ў журналістыцы. Навучанне будзе праходзіць афлайн у Варшаве і Вільнюсе на працягу 10 субот. Падаць заяўку можна да 11 верасня 2026 года.
Што гэта за праграма
«Журфак па суботах» – гэта праграма, падчас якой удзельнікі будуць працаваць з рэальнымі журналісцкімі задачамі, атрымліваць зваротную сувязь ад практыкуючых журналістаў і рэдактараў, а таксама ствараць уласныя матэрыялы пры падтрымцы ментараў.
Ілюстратыўнае фота: арганізатары.
Чаму там навучаць
Праграма падыдзе як тым, хто толькі пачынае свой шлях у журналістыцы, так і тым, хто ўжо працуе ў медыя, але хоча сістэматызаваць свае веды. Таксама далучыцца могуць людзі, якія пасля пераезду хочуць вярнуцца ў прафесію або змяніць сваю ролю ў рэдакцыі.
Навучанне будзе не толькі пра напісанне тэкстаў. Удзельнікі даведаюцца, як працаваць з крыніцамі інфармацыі, як уладкаваны жыццёвы цыкл навіны, дзе шукаць ідэі для матэрыялаў, а таксама як выкарыстоўваць штучны інтэлект у працы журналіста.
Праграму для «Журфака па суботах» распрацавала ўкраінская журналістка, медыяменеджарка і медыякансультантка Каця Гарчынская, якая супрацоўнічае з The Wall Street Journal, The Financial Times і The Kyiv Post.
Як будзе праходзіць навучанне
Удзел у праграме бясплатны. Навучанне будзе праходзіць у Варшаве або Вільнюсе.
У Варшаве заняткі пройдуць з 3 кастрычніка па 5 снежня 2026 года, у Вільнюсе – з 10 кастрычніка па 12 снежня 2026 года.
Праграма не аплачвае гатэль, але можа пакрыць выдаткі на транспарт па краіне, дзе праходзіць навучанне.
Важна: пасля навучання ўдзельнікі змогуць прайсці стажыроўку ў беларускіх рэдакцыях з індывідуальным суправаджэннем ментара і апублікаваць свае матэрыялы.
Як падаць заяўку
Заяўкі прымаюць да 11 верасня 2026 года. Да 16 верасня ўдзельнікі атрымаюць адказ і запрашэнне на другі этап адбору – суразмову.
Тым, хто жыве ў Літве, трэба запоўніць заяўку для Вільнюса, а тым, хто жыве ў Польшчы, – заяўку для Варшавы.
Арганізатары таксама прапануюць звяртацца па дадатковую інфармацыю: удзельнікам у Літве – на zurfak@baj.media., у Польшчы – на zurfak@solidarityby.eu.
Перепечатка материалов CityDog.io возможна только с письменного разрешения редакции. Подробности здесь.
