Ювелірны брэнд выпусціў новую калекцыю пад назвай VЁSKA і паказаў яе ў сваім інстаграме. У ёй срэбныя ўпрыгажэнні «Паміж Дажынкамі і Дзядамі», прысвечаныя беларускай вёсцы.
Стваральнікі калекцыі пішуць, што «ў гэтым праекце нам дапамог Андрэй з вёскі – тыктокер з яркім і пазітыўным кантэнтам.
Андрэй шмат падарожнічаў, але заўсёды вяртаецца ў родную вёску, дзе яго ведаюць усе. Яго гісторыя – гэта сумесь традыцый і сучаснасці».
Аўтары таксама ўклалі ў працу часцінку сваіх асабістых успамінаў, таму калекцыя VЁSKA аб’ядноўвае ў сабе не толькі класічныя вясковыя сімвалы. Упрыгажэнні адлюстроўваюць тое, як стваральнікаў называлі бабулі і дзядулі, а таксама сучасныя элементы, якія могуць вяртаць нас у дзяцінства.
«Напрыклад, як нас клікалі бабулі і дзядулі: Жэўжык, Валацуга, Шпак малы… Дадалі да гэтага літаратурныя і сучасныя сімвалы (“+375”, “Тутэйшы” і г.д.) і спакавалі ў файны фотасэт. Для нас ён нагадвае цёплае дзяцінства, калі падвор’е было населена лепшымі сябрамі, а вёска адчувалася нібыта цэлы сусвет», – дадаюць стваральнікі калекцыі.
Перадрук матэрыялаў CityDog.io магчымы толькі з пісьмовага дазволу рэдакцыі. Падрабязнасці тут.
