Легендарны беларускі гурт N.R.M. плануе сыграць «апошні» канцэрт

7 лістапада ў вільнюскім пабе Alaus Namai гурт N.R.M. прадставіць новы альбом АPOŠNI. Арганізатары анансуюць выступ як магчымасць пачуць гурт жыўцом «у апошні раз».

Найстарэйшая беларуская газета (беларускія сілавікі называюць яе «экстрэмісцкай») заўважыла, што гурт N.R.M. выступіць 7 лістапада ў Вільнюсе з канцэртам-прэзентацыяй новага альбома АPOŠNI. Мерапрыемства адбудзецца ў пабе Alaus Namai (A. Goštauto g., 8) і пачнецца а 19-й.

Сайт для куплі білетаў. Скрыншот: Ticketshop.lt.

Паводле арганізатараў, гэта «ваш шанц пачуць любімыя песні жыўцом у апошні раз». Акрамя канцэрта, у гэты дзень гурт разам з публікай адзначыць дзень нараджэння саліста Піта Паўлава.

Білеты ўжо ў продажы: кошт складае 20 еўра (70 руб.), а ў дзень выступу – 25 еўра (87 руб.).

Што гэта за гурт?

Пік папулярнасці легендарнага гурта N.R.M. прыйшоўся на канец 1990-х – пачатак 2000-х. Тады гурт называлі «вялікі» і «нумар адзін, які ўнёс найбольшы ўклад у развіццё айчыннага року». Менавіта ў гэты час з’явілася песня «Тры чарапахі», якая дагэтуль лічыцца адным з неафіцыйных гімнаў Беларусі.

Что почитать по теме: Ура! У Cеціва выклалі ўсе альбомы культавага N.R.M.

Пасля сярэдзіны нулявых актыўнасць калектыву пачала зніжацца. У 2011 годзе з гурта сышоў яго заснавальнік Лявон Вольскі. Кіраваць N.R.M. пачаў Піт Паўлаў, але вярнуць былую папулярнасць гурт ужо не змог.

У 2020 годзе, падчас пратэстаў, музыкі зноў сабраліся ў класічным складзе і выканалі «Тры чарапахі». Пазней, пасля падаўлення пратэстаў, і Вольскі, і ўдзельнікі N.R.M. былі вымушаны пакінуць Беларусь.

Перадрук матэрыялаў CityDog.io магчымы толькі з пісьмовага дазволу рэдакцыі. Падрабязнасці тут.