Беларусаў запрашаюць падаць заяўку на прэмію кінакрытыкаў «Чырвоны верас»

Арганізатары прэміі кінакрытыкаў «Чырвоны верас» пачалі прыём заявак ад беларускіх кінематаграфістаў, якія выпусцілі фільмы ў 2021 і 2022 гадах. Тут умовы.

Што за прэмія

Беларуская прэмія кінакрытыкаў «Чырвоны верас» адзначае найлепшыя дасягненні ў сферы беларускага кіно. Яе прысуджаюць кінакрытыкі, кінажурналісты, кінадаследчыкі ў трынаццаці намінацыях.

Прэмія дэкларуе важнасць мастацтва кіно для беларускай культуры і для дэмакратычных перамен у краіне.

Другі сезон прэміі пройдзе ў лютым 2024 года.

Намінавацца на «Чырвоны верас – 2024» могуць каротка- і поўнаметражныя ігравыя, дакументальныя і анімацыйныя фільмы і іх аўтары.

Як паўдзельнічаць

З 14 верасня да 14 кастрычніка можна даслаць ігравы, дакументальны альбо анімацыйны фільм, зняты беларусамі як у краіне, так і за мяжой.

Фільмы, якія былі створаны ў гэты час, але не дэманстраваліся публічна, таксама могуць намінавацца.

Важна: журы не разглядае стужак, знятых з удзелам дзяржаўных сродкаў рэжымаў Беларусі ці Расіі.

Падаць заяўку можна па спасылцы.

Перадрук матэрыялаў CityDog.io магчымы толькі з пісьмовага дазволу рэдакцыі. Падрабязнасці тут.