14 студзеня суд Цэнтральнага раёна Гомеля прызнаў YouTube-канал «Міністэрства сепультуры» «экстрэмісцкім». Цяпер на яго падпісана больш за 10 000 чалавек.
Аляксандр Чарнуха, аўтар гэтага праекта, запэўніў сваіх гледачоў, што «працягне расказваць пра беларускую музыку, бо калі маўчаць, дык нічога і не будзе».
Калі памятаеце, CityDog.io пісаў, што 4 сакавіка 2023 года на YouTube з’явіўся новы аўтарскі канал «Міністэрства сепультуры», аўтар якога вырашыў пачаць з развянчання і стварэння новых міфаў.
Што вядома пра аўтара гэтага праекта?
Саша Чарнуха ў свой час быў досыць папулярным журналістам Onliner.by, а пасля пачатку рэакцыі на падзеі 2020 года сышоў з рэдакцыі і з’ехаў з краіны. Музычны журналіст, нейкі час ён рабіў сабе імя не рэзкімі рэцэнзіямі, на якіх набіваў руку не адзін год, а кнігай.
«Раман “Свінні” – гэта гісторыя аднаго выдуманага райцэнтра ў неіснуючай дзяржаве, – напісана ў анатацыі. – Вядома, чытач хутка разбярэцца ў сістэме каардынат і прыдумае прыдатную назву для гэтай краіны. Чыноўнікі, якія страцілі сувязь з рэальнасцю і якія пасылаюць адзін аднаму важныя, але ад гэтага яшчэ больш смешныя факсы; сілавікі ў балаклавах, якія добра выконваюць толькі адну задачу – ахоўваюць помнік Леніну; спіты рэдактар раённай газеты, што строчыць атрутныя пасквілі пра нябачнага ворага; грозная дырэктарка дома культуры, якая ўмее толькі выпальваць цэнзурай любую песню».
Перадрук матэрыялаў CityDog.io магчымы толькі з пісьмовага дазволу рэдакцыі. Падрабязнасці тут.
