Сёння многія аддаюць перавагу таролагам і астролагам, лічачы, што яны дапамогуць хутчэй вырашыць праблемы. CityDog.io вырашыў разабрацца, чаму псіхатэрапія саступае па папулярнасці эзатэрычным практыкам і як міфы пра складанасць і дарагоўлю тэрапіі перашкаджаюць людзям звяртацца да псіхолага.
Валерыя: «Пайшла да таролага, бо сеансаў у псіхолага было мала»
Валерыі 23 гады. Дзяўчына расказвае, што звярталася да паслуг таролагаў пасля таго, як рассталася з хлопцам. Кажа, што да таро ставіцца як да невялікага перакладвання адказнасці, але ўсё роўна гатовая аддаваць грошы на расклады.
– Пасля расставання з партнёрам я пачала шукаць адказы на свае пытанні і новыя спосабы разабрацца ў сабе. Паралельна я хадзіла да псіхолага, але размоў з ім мне было мала. У нейкі момант вырашыла пайсці да таролага, бо цяпер гэта даволі папулярна.
Першы раз я пайшла да адной таралагіні па рэкамендацыі сяброў. Сеанс мяне крыху здзівіў: яна дастала ўсяго тры карты і расшыфравала іх па маім запыце. Угадала даволі дакладна, але мне не хапіла глыбіні тлумачэнняў. Таму я вырашыла паспрабаваць знайсці іншага таролага. Проста ўвяла ў Instagram «таролаг», свой горад і выбрала той профіль, які прывабіў па афармленні.
Мне пашанцавала: другая таралагіня апынулася «прасунутай» жанчынай. Яна не проста займалася картамі, а як быццам нават падпрацоўвала псіхалагіняй – давала канкрэтныя парады, а не толькі «магічныя» разважанні. Напрыклад, выпала карта, яна кажа: «Ты цяпер у пазіцыі ахвяры, у дзіцячай ролі». Гэта я, канечне, спрашчаю, але сэнс быў такі: мне трэба было ўзяць сябе ў рукі, не спадзявацца на цуды, а выбірацца самой. Мне гэта спадабалася – усё было дакладна і па справе.
Яна адказала на мае сем-дзесяць пытанняў, не спрабавала мне спадабацца. Гэта, напэўна, і зачапіла. У выніку я заказала ў яе яшчэ два расклады.
Апошні расклад я рабіла месяцы два таму. Тады мне проста хацелася з ёй пагутарыць, бо яна прыцягвала мяне як асоба. Тэма размоў была не супергарачай, але цікавай. Былі моманты, дзе нешта не сыходзілася, і карысці для сябе я вынесла менш, чым раней, але ўсё роўна гэта быў цікавы вопыт.
Цяпер я лічу, што таралогія, як і астралогія, – гэта крыху перакладванне адказнасці. Таро, як мне здаецца, – добры спосаб, каб экстранна заматываваць сябе і хутка пераканаць сябе ў чымсьці. Аднак у любым выпадку ніякія карты і гараскопы не ведаюць цябе так добра, як ты сама. Яны могуць быць толькі дадатковай падтрымкай.
Паліна: «Навошта траціць кучу грошай і часу на псіхолага, калі можна зрабіць адзін расклад і нарэшце адважыцца на тое, пра што доўга думаў?»
Картамі таро дзяўчына займаецца ўжо каля двух гадоў. Паводле яе слоў, часцей за ўсё прыходзяць з пытаннямі пра грошы або пра каханне.
– Мяне з дзяцінства цікавіла эзатэрыка. Я верыла, што ёсць нешта вышэйшае за нас. Маё захапленне картамі пачалося з вывучэння чакраў і вібрацый, а затым прывяло да больш глыбокай тэмы – сутнасці. Таро адгукнуліся мне мацней за ўсё, таму я вырашыла паглыбіцца ў вывучэнне гэтага свету. Паступова пачала рабіць расклады для знаёмых, а потым перайшла на платныя кансультацыі.
Мне важна, каб мае расклады дапамагалі людзям, а не прыносілі толькі фінансавую выгаду. Таму ў мяне дэмакратычныя цэны: адно пытанне каштуе ўсяго 15 рублёў.
На практыцы 90% людзей звяртаюцца з пытаннямі пра грошы – працу, фінансы, дарагія куплі – або пра каханне. Гэта тыя тэмы, якія больш за ўсё турбуюць сучаснага чалавека. Бываюць забаўныя сітуацыі. Напрыклад, аднойчы я раскладвала карты на асабістае жыццё сваёй сяброўцы. У яе быў муж, але расклад нечакана ўказаў на іншага маладога чалавека. Аказалася, што гэта быў яе каханак, пра якога я тады нічога не ведала.
У маёй практыцы не было занадта экстрэмальных сітуацый, але адзін выпадак запомніўся. Дзяўчына сумнявалася, ці варта ёй купляць машыну, якая была яе даўняй марай. Расклад паказаў, што ўсё пройдзе паспяхова, і ў выніку яна засталася задаволеная пакупкай.
Што тычыцца прагнозаў, важна разумець, што карты паказваюць не дакладную будучыню, а толькі верагодныя вынікі. Таро хутчэй пра «эфект матылька»: яны паказваюць, што адбудзецца, калі ты абярэш той шлях ці іншы. Гэта дазваляе чалавеку ўбачыць магчымыя наступствы сваіх дзеянняў і змяніць курс, калі нешта яму не падабаецца.
Ці можна давяраць картам? Думаю, што так. Сёння людзі ўсё больш імкнуцца зразумець свет з усіх бакоў, вывучаючы лёс, астралогію, нумералогію і таро. Многія хочуць даведацца, што іх чакае ў будучыні або як да іх ставяцца іншыя людзі. Таро – адзін з найбольш зразумелых і даступных спосабаў адказаць на гэтыя пытанні.
Навошта траціць кучу грошай і часу на псіхолага, калі можна зрабіць адзін расклад і нарэшце адважыцца на тое, пра што ты доўга думаў? Я згодная, што тэрапія можа мець больш глыбокі і моцны эфект на нас. Але калі эфект патрэбен тут і цяпер, то чаму б не паспрабаваць зрабіць расклад? Відавочна, горш не будзе.
Адзінае, што мне не падабаецца ў таро, – гэта агульныя расклады. Яны не працуюць. Гэта як чытаць гараскоп на дзень і жыць па ім, спадзеючыся, што ўсё супадзе. Немагчыма, каб адзін расклад падышоў мільёнам людзей. Таро – заўсёды нешта індывідуальнае. Таму, калі хочаце зразумець сваю будучыню ці лёс, лепш навучыцца раскладваць карты самастойна. Гэта будзе значна больш карысным і дакладным, чым спадзявацца на агульныя расклады з TikTok ці YouTube.
Чаму людзі гатовыя траціць грошы на таролагаў, нумеролагаў, астролагаў, але не звяртаюцца да псіхатэрапеўтаў?
– Я б тлумачыў тэндэнцыю таго, што людзі часцей ідуць да таролагаў і астролагаў, містычным мысленнем.
Фактычна гэта адзін з самых першых тыпаў мыслення чалавека, бо да з’яўлення навукі людзям трэба было неяк растлумачыць свет вакол сябе. Напрыклад, калі здараліся бедствы, іх лічылі пакараннем ад бога, бо іншых тлумачэнняў не было.
Галоўная рыса містычнага мыслення – гэта сувязь паміж падзеямі, якія на самой справе не звязаны. Напрыклад, хтосьці можа верыць, што разбітае люстэрка прыносіць няшчасці ці што чорная котка, якая перабегла дарогу, прыцягвае непрыемнасці. Гэта скажэнне мыслення: людзі бачаць сувязі там, дзе іх няма. Больш за тое, многія прымхі накшталт плявання праз плячо ці стуку па дрэве таксама заснаваны на такіх перакананнях.
Чаму ж многія людзі ідуць да астролагаў і таролагаў, а не да псіхатэрапеўтаў? Усё проста: псіхатэрапія – адносна новая з’ява ў нашых краінах. Напрыклад, кафедра псіхалогіі ў Мінску з’явілася не так даўно, а вось эзатэрыка існуе ўжо тысячагоддзямі. Акрамя таго, у канцы 80-х і пачатку 90-х гадоў астралогія стала вельмі папулярнай, а астролагі часта з’яўляліся на тэлебачанні. Таму для многіх людзей прасцей тлумачыць свае праблемы праз карты таро ці ўплыў планет, чым разбірацца ў складаных пытаннях псіхалогіі.
Таксама існуе міф, што псіхатэрапія – гэта доўга, дорага і не дае гарантый. У адрозненне ад гэтага, эзатэрыкі часта абяцаюць вырашэнне ўсіх праблем за адну сустрэчу. Вядома, людзям хочацца хуткага і простага рашэння, а праца над сабой праз псіхатэрапію патрабуе часу і намаганняў. Менавіта таму многія выбіраюць больш лёгкі шлях.
Чамусьці яшчэ людзей здзіўляе, калі чалавек адначасова звяртаецца да псіхолага і таролага. Насамрэч гэта проста адлюстроўвае тое, наколькі розныя спосабы мыслення могуць суіснаваць у адным чалавеку.
Часта людзі выбіраюць эзатэрыкаў з-за апавяданняў знаёмых. Напрыклад, хтосьці пачуў, што знаёмы схадзіў да таролага і вырашыў усе свае праблемы за адну сустрэчу. Гэта здаецца цудам, і такія гісторыі вельмі прыцягваюць людзей. У псіхатэрапіі такія выпадкі таксама бываюць, але яны нашмат радзейшыя, бо тэрапія зноў жа патрабуе шмат працы.
Псіхатэрапеўты сутыкаюцца з цяжкасцямі, таму што канкурыраваць з «цудамі» складана. Часта тыя, хто расчараваўся ў псіхатэрапіі, мелі завышаныя чаканні і спадзяваліся на імгненныя змяненні пасля першых сеансаў.
Пры гэтым галоўная перавага псіхатэрапіі – гэта навуковая аснова і прынцып «не нашкодзь». З аднаго боку, эзатэрыка абяцае цуды, а з іншага – не дае ніякіх гарантый.
Якія яшчэ міфы пра псіхатэрапію ўплываюць на рашэнне не звяртацца па дапамогу?
– Акрамя жадання хутка вырашыць свае праблемы з дапамогай раскладаў, ёсць мноства міфаў, якія спыняюць людзей ад звароту да псіхолагаў. Самы распаўсюджаны – страх асуджэння і насмешак. Псіхатэрапія адрозніваецца ад звычайных размоў тым, што тут прысутнічаюць шчырасць і адсутнасць ацэнкі. Псіхолаг не дае прамых парад і ўказанняў. Замест гэтага спецыяліст дапамагае даследаваць перажыванні чалавека, яго паводзіны і выбары.
Яшчэ адзін распаўсюджаны страх – што навакольныя могуць негатыўна ўспрыняць той факт, што чалавек ходзіць да псіхолага. Чамусьці нармальна звяртацца да юрыстаў, дактароў, стылістаў, але псіхалагічная дапамога ўспрымаецца інакш. Аднак кансультацыі з псіхолагам – гэта такі ж важны аспект клопату пра сваё здароўе, як і фізічны клопат пра цела.
Многія таксама баяцца змяненняў, бо, як бы дзіўна гэта ні гучала, адчай, пакуты ці іншыя цяжкія пачуцці могуць стаць звыклымі. У тэрапіі адсутнічае «анестэзія» ў выглядзе гатовага рашэння, чалавек павінен прайсці праз свой душэўны боль, каб навучыцца з ім спраўляцца. Аднак гэта робіцца з падтрымкай спецыяліста, што дапамагае не адчуваць сябе пакінутым.
Зварот да эзатэрычных практык часта звязаны з жаданнем перакласці адказнасць за сваё жыццё на кагосьці іншага. Людзі прыходзяць з пытаннямі: «Скажыце, як лепш паступіць? Чаму ў мяне праблемы? Як іх вырашыць?» У такіх выпадках няма апоры на сябе, і гэта прыводзіць да залежнасці ад чужой думкі.
Важна разумець, што астралогія і варажба не даюць чалавеку свабоды выбару і магчымасці самастойна прымаць рашэнні. Тэрапія, наадварот, развівае здольнасць знаходзіць уласныя шляхі выхаду з цяжкіх сітуацый, абапіраючыся на свае сапраўдныя жаданні і думкі.
У выніку псіхалагічная праца дапамагае здабыць свабоду, упэўненасць і самастойнасць, што значна больш карысна для доўгатэрміновага дабрабыту, чым кароткачасовае палягчэнне, атрыманае ад эзатэрычных практык.
Перадрук матэрыялаў CityDog.io магчымы толькі з пісьмовага дазволу рэдакцыі. Падрабязнасці тут.
Фота: Unsplash.com.
