Куды пайсці ў выхадныя 14–16 ліпеня ў Мінску, Варшаве, Вільнюсе і іншых гарадах, дзе жывуць беларусы

«Сила ветра» кліча на начную гонку ў стылі дыска. Гэта як? Гэта ноччу! У 21:00 выходзяць у мора, падсвятляюць яхты і ладзяць рэгату ў прыцемках і бліскаўках.

Пасля на беразе слухаюць музыку і ядуць хот-догі, узнагароджваюць пераможцаў гонак і ўладальнікаў самых крутых клёшаў. За лепшы дыска-вобраз прыз – бясплатны ўдзел у гонцы.

Маркет KaliLaska гэтым разам праходзіць на працягу цэлага тыдня. Пачалі ў мінулую нядзелю, а скончаць у гэту суботу – яшчэ паспееце. Абнаўляюць асартымент кожны дзень, таму знайсці штосьці цікавае яшчэ дакладна можна.

Адзенне, абутак, кнігі, аксесуары, вініл, пласцінкі, дамашні тэкстыль і іншае. Забягайце!

«Мы не будзем абяцаць вам самай гарачай вечарыны лета – мы яе зробім!» – кажуць арганізатары. А вам застаецца толькі акунуцца ў атмасферу адпачынку, цяпла, лета і любімай музыкі з MONTANA.

У батанічным садзе адбудзецца фестываль самаразвіцця і здаровага ладу жыцця MY WAY. Вас чакае шмат цікавых зон з актыўнасцямі: ёга, спорт, лекцыі па медыцыне, ментальным здароўі і медытацыі, Chill Out для адпачынку, маркет, фуд-корт, дзіцячая і сямейная зоны, ароматэрапія і іншае.

Прастора «Манахром» прадстаўляе вечар джаза і альтэрнатыўнай неакласічнай музыкі. Акрамя вядомых джазавых кампазіцый Мішэля Петручыані, Коры Генры і Аляксандра Цфасмана, у праграме прагучаць лепшыя канцэртныя творы піяніста і кампазітара Філіпа Шпартава – «Танга» («Элегія»), Tangos de Fuego і іншыя.

А таксама вы зможаце пазнаёміцца з жанрам piano flamenco, які цяпер набірае папулярнасць.

У кнігарні-кавярні Marks працуе новая файная выстава Лізы Хіхлушкі «Мінск у галаве» – і гэта шчырае прызнанне ў каханні да горада: шчымлівыя малюнкі Мінска, якія з’явіліся ў час, пакуль аўтарка знаходзілася ўдалечыні ад дома.

«Асмолаўка, панэлькі і нават Мінскае мора – месцы, якія назаўжды ў маіх успамінах. Памяць, як вядома, недасканалая, таму гэтыя выявы быццам выняты з маёй галавы!» – кажа мастачка.

Два тыдні ў арт-прасторы «Вершы» будзе праходзіць праект пад назвай «Арт-тэрапія Сярожы Савіча» – амаль што летні фестываль ад мастака і яго каманды.

У праграме запланавана шмат цікавага: сустрэча з самім мастаком, Pets day – занятак па маляванні з гадаванцамі, аўтарскае кіно з маладымі рэжысёрамі, лекцыя Андрэя Пічушкіна пра мемы ў мастацтве, перформанс і іншае.

У Зэльве пройдзе трэці міжнародны фестываль гістарычнай рэканструкцыі «Легендарныя эпохі-2023».

У праграме: масавыя бітвы і адзіночныя двубоі; конныя турніры і тактычныя манеўры; рэканструкцыя вызвалення Зэльвеншчыны ў 1944 годзе; паходныя лагеры рэканструктараў, дзе будзе прадстаўлены побыт мінулых часоў; інтэрактыўныя пляцоўкі: лукавыя і арбалетныя ціры, сярэднявечныя гульні ды іншае; горад майстроў-рамеснікаў; фотазоны; вечаровае музычнае шоу.

Купалаўцы паказваюць у Варшаве «Камедыю Юдзіфі» – новую інтэрпрэтацыю біблейскай гісторыі, якая цягам стагоддзяў неаднаразова прыцягвала ўвагу мастакоў, кампазітараў і паэтаў.

Спроба асэнсаваць жыццё і ўчынкі Юдзіфі з сённяшняга пункту гледжання, зразумець не толькі рэлігійныя, але і псіхалагічныя матывы паводзін біблейскіх герояў. Спроба вытлумачыць іх гісторыю як універсальную прытчу аб сутыкненні лёсаў чалавека з няўмольным рухавіком гісторыі.

У гэту суботу беларусы ладзяць чарговую гульню Detected. Трэба будзе шмат хадзіць па раёне і разгадваць галаваломкі – таму рыхтуйцеся, што лёгка не будзе.

Каманды – па 2-3 чалавекі. Таму бярыце сяброў і рэгіструйцеся.

Free Belarus Center запрашае беларускіх актывістак на бясплатны двухдзённы трэнінг па самаабароне і асертыўнасці для жанчын па метадзе WenDo. У бяспечнай прасторы вы даведаецеся пра гендарны гвалт, адстойванне ўласных межаў – асертыўнасць – і спосабы яго развіцця, а таксама адпрацуеце тэхнікі самаабароны і проста абмяркуеце пытанні, якія вас хвалююць.

Трэнінг правядзе Вольга Ланеўская, сертыфікаваная трэнерка па WenDo, прадстаўніца фонду «Аўтаномія».

У гэтыя выхадныя ў трэці раз пройдзе Фестываль Абуджаных TUTAKA 2023. У праграме – музыка, майстар-класы, дыскусіі, кінапаказы, спартовыя і тэатральныя мерапрыемствы і проста ўсебеларускі пікнік у разгар лета ў жывапісным лесе побач з возерам.

Можна будзе сустрэцца з Маргарытай Ляўчук, Крысцінай Дробыш, Маляванычам, Андрэем Саўчанкам, Кацяй Сныцінай і іншымі. Зайграюць «Дай Дарогу!», «НОЧЫ», BOTANIC PROJECT, Dzieciuki, Papa Bo Selektah і Dlina Volny.

У Познані адчыняе свае дзверы беларуская школа – чакаюць паненак і спадарыкаў школьнага і дашкольнага ўзросту.

У праграме: экскурсія па школе, знаёмства з настаўнікамі, моўныя, мастацкія і музычныя заняткі, гарбата з ласункамі на свежым паветры.

У Гданьску пройдзе незвычайны рэлакс-канцэрт «Музыкатэрапія. Шэдэўры». Вас чакае ўтульная атмасфера са свечкамі і гукамі музыкі, а таксама медытатыўны відэашэраг у суправаджэнні раяля, скрыпкі, флейты, вакала з тыбецкімі пяючымі кубкамі, званочкамі Кошы, гукамі прыроды ды іншымі інструментамі для рэлаксу.

CreateCulture Space запрашае на новую «Ноч правалаў» на тэму бюракратыі: апавяданні пра правалы, смешныя няўдачы і досвед бюракратыі ў розных сітуацыях ды краінах.

Хто з нас не сутыкаўся з бюракратыяй? Яна можа стаць не проста крыніцай галаўнога болю, але і выклікаць сапраўдную фрустрацыю. На гэтым мерапрыемстве кожны і кожная з вас зможа расказаць сваю гісторыю – негатыўную або пазітыўную, звязаную з бюракратыяй, незалежна ад таго, які досвед вы атрымалі.

Няхай гэта будзе нешта пацешнае пра нечаканыя перашкоды ці ўражанні пра сістэму бюракратыі ў розных краінах – усё, чым хочацца падзяліцца.