У сярэдзіне чэрвеня міністр архітэктуры і будаўніцтва Беларусі падзяліўся, якім бачыць ідэальныя гарады ў рэгіёнах. На яго словы адрэагавала «Менская ўрбаністычная платформа»: на сваёй старонцы ў Instagram каманда апублікавала невялікі разбор, у якім патлумачыла, што не так з прапановамі міністра.
CityDog.io вырашыў падзяліцца думкамі экспертаў з вамі.
Што адбылося
12 чэрвеня міністр архітэктуры і будаўніцтва Руслан Пархамовіч у рамках Адзінага дня інфармавання пабываў у Чэрвеньскім будаўнічым каледжы. Падчас візіту і размовы з выкладчыкамі і навучэнцамі чыноўнік падзяліўся сваім бачаннем забудовы ідэальнага беларускага гарадка.
– Павінна пераважаць сярэднепавярховае будаўніцтва. Цэнтр – гэта невялікія шматкватэрныя жылыя дамы. У першую чаргу, на мой погляд, сацыяльныя кватэры і арэнднае жыллё. Хто мае дастатковы ўзровень прыбытку, тыя, вядома, павінны мець свой асабісты індывідуальны дом.
Такая ў нас мэта па забеспячэнні камфортных умоў для пражывання. Усё гэта, безумоўна, павінна добра ўжывацца з вытворчай і сацыяльнай сферамі.
А вось што кажуць наконт гэтага ўрбаністы
Эксперты «Менскай урбаністычнай платформы» разабралі кожную з прапаноў Руслана Пархамовіча і патлумачылі, чаму гэта не самыя лепшыя рашэнні для беларускіх райцэнтраў.
- «Павінна пераважаць сярэднепавярховае будаўніцтва. Цэнтр – гэта невялікія шматкватэрныя жылыя дамы».
То бок, па прапанове міністра, цэнтральныя часткі гарадоў (у якіх насельніцтва налічвае каля 50–200 тысяч чалавек) будзе забудавана 3–5-павярховымі дамамі. Па меркаванні экспертаў, гэта можа быць не лепшай ідэяй для гістарычных і ўжо забудаваных цэнтраў. «Шчыльная забудова важная, але не заўсёды абавязковая для стварэння камфортнага гарадскога асяроддзя».
- У першую чаргу сацыяльныя кватэры і арэнднае жыллё.
Урбаністы лічаць, што такая практыка – калі ў асобную катэгорыю вылучаюць сацжыллё і жыллё людзей з невялікімі заробкамі – ператварае кварталы ў больш уразлівыя і менш прывабныя для жыхароў гарадоў. Таму найлепшы (і, як паказваюць некаторыя праекты, паспяховы) варыянт – гэта раёны са змешанымі тыпамі жылля.
«Гэта спрыяе разнастайнасці і развіццю, ствараючы новыя формы ўзаемадзеяння паміж людзьмі і паляпшаючы агульнае асяроддзе», – лічаць эксперты.
- Хто мае дастатковы ўзровень прыбытку, павінен мець свой дом.
З гэтым сцвярджэннем «Менская ўрбаністычная платформа» таксама не згодная, таму што, нягледзячы на памер даходаў і сям’і, нельга навязваць тып жылля. Прыярытэт – асабістыя патрэбы кожнага жыхара горада, а такія стандартызаваныя ідэі недапушчальныя.
«Кожны горад унікальны і павінен выбіраць сваю мадэль развіцця з улікам уласных асаблівасцей і магчымасцей», – адзначаюць урбаністы.
Ну і напрыканцы каманда платформы нагадвае, што камфортны горад – гэта асяроддзе, дзе кожны адчувае сябе важным і ўлічаным. Ён уключае ў сябе і зялёныя зоны, і эфектыўны грамадскі транспарт, і інклюзіўныя грамадскія прасторы, і іншыя фактары, якія робяць месца ўтульным і прывабным.
Перадрук матэрыялаў CityDog.io магчымы толькі з пісьмовага дазволу рэдакцыі. Падрабязнасці тут.
Фота: Unsplash.com.