Пасля Дня Рэспублікі адзін з найстарэйшых паркаў Мінска выглядае крыху абноўленым, але яшчэ больш незвычайным. І калі раней гэта незвычайнасць была звязана з яго закінутасцю і заросласцю – раней гэта быў ці не адзіны такі дзікі парк недалёка ад цэнтра, – то зараз яго рэнавіравалі «дзёшава і сярдзіта». У літаральных сэнсах слоў.
Што значыць «рэнавіравалі "дзёшава і сярдзіта"»?
У інтэрв’ю газеце «СБ. Беларусь сегодня» кіраўнік адміністрацыі Заводскага раёна Сяргей Масляк прызнаўся, што парк рэнавіравалі за кошт сродкаў бягучага ўтрымання. «Але ўсё прадумана да дробязей, і ўкладзена душа», – апраўдаўся чыноўнік.
У абноўленым парку паспрабавалі пракласці і заасфальтаваць сцяжынкі так, як іх выкарыстоўваюць наведвальнікі. Пабудавалі некалькі фітнес-пляцовак. А ў дадатак паставілі шматгаловы светлафор, фігуру свістка, па алеі расставілі дзіўныя дарожныя знакі. І як вішанька на торце – заўсёдны зубр у глыбі парка.
А што з другой часткай парку?
«У бліжэйшай перспектыве – рэканструкцыя другой часткі парку, – кажа чыноўнік. – У жніўні чакаем экспертызу, якая дазволіць распачаць працы. Плануем стварыць скейтпарк, воркаўт-, баскетбольную і валейбольную пляцоўкі. Задумалі ўсталяваць у гэтай зоне і самае вялікае ў Мінску дзіцячае гульнявое месцейка».
Перадрук матэрыялаў CityDog.io магчымы толькі з пісьмовага дазволу рэдакцыі. Падрабязнасці тут.
Фота: CityDog.io.